الخميس، 19 يوليو 2012

يا تعليمك يا مصر

المقوله الشهيره على الاطلاق (كليه قمه وكليه كخه)
يعنى ايه كليه قمه يا جهله ؟؟؟ يعنى خازووووق كبييييييير وانت تروح تقعد عليه ..هى دى كليات القمه...
وقت النتيجه بتاعه الثانويه شوفت كل سنه بشوف ناس بيغمى عليها وناس تبكى وناس تنط من الفرح وشربات ..وليه ده كله الاهتمام ده ؟؟ التعليم فى مصر ميتسحقش كل الاهتمام ده ...
(((التعليم فى مصر عمره ماكان مقياس ابدا لنسبه ذكائك او نسبه نجاحك وفشلك))) !!!!!.. 
كام واحد خريج طب وهندسه وعلوم وسياسه وكليات قمه وقاعدين على الارصفه ؟؟
طب كام واحد خريج طب وبيشتغل فى سايبر كمبيوتر ؟؟
كام واحد خريج هندسه شغال سكرتير ؟؟
محدش يقول كل واحد يروح يدرس اللى بيحبه وادخل الكليه اللى انت بتحبها لان التعليم فى مصر مش بيحدد انت بتحب ايه وموهوب فى ايه ..
التعليم فى مصر = تشتيت الطالب فى كل مجال شويه + خراب بيت ابوه دروس +يدخل جامعه مش على مزاجه يلاقى دكاتره تتنطط عليه =شلل الطالب +موت ابوه
التعليم فى مصر = خد كورس من مكان جامد (اهم حاجه الشهاده يا ضنايا) + لغه ولا اتنين = شغلانه محترمه
طب والشهاده بتاعه الجامعه ؟؟ لفها وابرمها واعملها سجاره.
منظومه التعليم كلها زباله لدرجه ان تفكير وعقليات المدرسين نفسها حقيره ...اى والله اسألونى انا عن المدرسين 
كرهت الرسم لدرجه انى برسم ورده بالعافيه بسبب مدرسه ايام اعدادى ..كانت تنفخ ام اللى مش معاه كراسه رسم ولا الالوان ولا مش مهتم بحصتها ...وقبل كده كنت فى ابتدائى وكان هناك حصه تعليم الخياطه مش فاكره بيقولوا عليها ايه ,, بس المدرسه كانت بتمد اللى ميجبش القماشه بتاعته والابره وكده ..امى كانت تجيبلى الادوات بس انا كنت اعاند واروح من غير ادوات وابقى هاين عليا اقولها ورينى اخرك يا ميس ... 
وقابل يا معلم من الاشكال دى كتير تلاقى ماده المفروض انك تخفف عن نفسك شويه فيها تلاقيها من اقذر الحصص ...
الضرب اتلغى من كل البلاد الا مصر ..مصر لغت التعليم كله وسابت بوابين يدرسوا لطلاب ضحايا ...
اى كائن حى دخل مدرسه مصريه لازم يتأهل نفسيا ...اللى بيحصل فى التعليم والمدارس ده مؤامره ومحاوله لتخريب العقول..
افتح الكتاب المدرسى احفظه صم ..فهمت منه حاجه ؟؟
لا ..مش مشكله روح حط اللى حفظته فى ورقه الاجابه وبالشفا وفوت علينا بكره.
قوه اى امه بقوه تعليمها ... نهايه اى امه بضياع تعليمها