الاسلام انتصر!!!!!

الاسلام انتصر..ماشاء الله الله اكبر..بارك الله فيكم..قبيلتى وعشيرتى..مرسى يأكل العجوه...وبيفطر بسبع بلحات رطب على الصبح عشان دى السنه...مرسى حافظ القرءان كله ربنا يحميه...الراجل بيصلى السنه قبل الفرض...حرم الرئيس لابسه خمار
احنا مال ابونا بيصلى ولا لا ومراته لابسه ايه..ماتلبس اللى تلبسه المهم غيرها لاقى يلبس ولا لا؟؟
طب ياريس انت بتصلى ها وبعدين؟؟ايوه يعنى لما تكون بتصلى ده هيفدنى انا فى ايه؟؟هشبع؟؟هلاقى لبس؟؟هلاقى سكن؟؟هلاقى فرص عمل؟؟
جميل ان رئيسك بيصلى ويصوم..دى حاجه لطيفه فحت بس لما غيرى انتخبه مكنش عشان بيعرف يصلى ولا لا..اسس اختيار الرئيس مش هتبقى درجه تدينه ايه ولكن مؤهلاته ايه ودرجه ايمانه بالعلم والديمقراطيه والعداله ..ماهى الثوره قامت عشان انعدام العداله ...
الناس انتخبت واحد عشان عندها امل فيه انه يبقى عنده القدره انه يحقق امال شعب كامل فى نزعهم من العشوائيات والجهل والفقر..
صلاتك وصومك وبلحاتك وعجوتك وقراءتك للقرءان وحفظك له مش هيفيدونى ولا هيفيدوا غيرك فى حاجه اطلاقا..انت المستفيد وحدك فى قبرك وفى اخرتك سيدى الرئيس..
سينتصر الاسلام عندما يسود العدل بين الناس ..ينتصر الاسلام عندما يكون للعلم مكانه بين الناس (نحن امه اقرء) ..ينتصر الاسلام عندما يكون الامان سمه الدوله..ينتصر الاسلام عندما ينتهى عصر انا نمت من غير عشا اصلى مش لاقى رغيف العيش..

 لذا ياريت انصار مرسى ميلعبوش اللعبه الرخيصه بتاعه شايفين مرسى بيصلى ومراته لبسها بسيط ...ياريت نفتكر عصام شرف اول مادخل مجلس الوزراء وشال جزمه ست فلاحه فى ايده واستقبل الغلابه؟؟!! عمل ايه الحاج عصام شرف للغلابه ؟؟...
كفايه لعب بالدين وبمشاعر الناس يا غنم

طرطور

كنت فى شغلى لما سمعت نتيجه الانتخابات اللى متلزمنيش ببصله..ماانا اصلى مشاركتش فى اختيار الطرطور..

المهم نزلت الشارع بعد ماعرفت النتيجه انا مكنتش فرحانه ولازعلانه بس يمكن لو كان شفيق كسب كنت انتقلت الى رحمه الله تعالى بمرض صعب شويه اسمه (الشلل)..بس لما تشوف وشوش الناس وفرحتهم وزغاريط يا معلم والله فرحت لفرحه الناس دى,,, ماهو اصل مش مكتوب علينا نفضل فى كأبه الى الأبد ....

احتمال كنت تلاقى ناس مؤيده لشفيق نزلت ورقصت للصبح مع اصحابها وجيرانها المؤيدين لمرسى لمجرد انهم محتاجين يفرحوا..

الاحلى من ده كله لما بسأل اى بنى ادم وتقوله هنعمل ايه بعد الريس ماجه؟؟الاقى اللى يقولى نتحد بقه ونقف ورا الرئيس..واللى يقولى مش عايزين نصنع فرعون جديد...واللى يقولى الاسلام انتصر!!!! صحيح مفهمتهاش اوى بس قشطه عديتها ماهو اصلى زهقت خناق واعتراض على افكار الناس اللى قدامى ..اخد اجازه لمده يوم واحد للخناق والاعتراض لأفكار اللى قدامك..

بس انا منفائله الصراحه.........